Lesen Sie hier den originalen lateinischen Text, in dem Kühnring/Hecimanneswisa erstmals erwähnt wurde:

In nomine sancte et individue trinitatis. Heinricus divina favente clementia rex. Notum sit omnibus Christi nostrique fidelibus tam futuris quam presentibus qualiter nos pro remedio nostri carnalis patris Heinrici III. regis secundi Romanorum imperatoris augusti et ob interventum nostre dilectissime matris scilicet Agnetis imperatricis auguste nec non ob petitionem nostrorum fidelium videlicet Willihelmi marchionis et Ernesdi marchionis cuidam servienti nomine Azzo marchionis Ernusdi tres regales mansos in villa que vocatur Hecimanneswisa et in marcha et in comitatu predicti marchionis Ernusdi sitos cum omnibus pertinentiis id est areis edifitiis terris cultis et incultis agris pratis pascuis silvis venationibus aquis aquarumque decursibus molis molendinis piscationibus exitibus et reditibus viis et inviis quesitis et inquirendis et cum omni iure et utilitate que ullomodo poterit inde provenire in proprium dedimus tradidimus condonavimus eo videlicet tenore ut prefatus Azzo de supradicto predio liberam deinceps potestatem habeat tenendi dandi vendendi comutandi precariandi posteris relinquendi vel quicquid sibimet placuerit inde faciendi. Et ut hec nostra regalis traditio stabilis et inconvulsa omni succedentis temporis permaneat evo hanc cartam inde conscriptam manu propria ut infra videtur corroborantes, sigilli nostri impressione iussimus insigniri.
Signum domini Heinrici (M) quarti regis.
Winitherius cancellarius vice Liutdaldi archicancellarii et archiepiscopi recognovi.
Data IIII kal ian. anno dominice incarnationis MLVII, indictione X, anno autem domini Heinrici IIII. regis ordinationis III, regni I, actum Radespone; in dei nomine feliciter amen.